Засаг даргын шуурхай хуралдаанаас ...

  Орхон аймгийн Засаг даргын шуурхай зөвлөгөөн өнөөдөр 15 цагаас цахимаар хуралдлаа.  Хуралдааныг Орхон аймгийн Засаг дарга С.Батжаргал удирдан явууллаа. 

  Засаг даргын өмнөх шуурхай зөвлөгөөнөөс өгөдсөн үүргийн дагуу ирэх жилүүдэд хийгдэх хөрөнгө оруулалт бүтээн байгуулалтын томоохон төслүүд болох 1000 айлын орон сууц, захын гэр хорооллууд руу инженерийн шугам сүлжээ татах, авто вокзал шинээр барих гэх мэт ажлын зураг төсвийг гаргах ажлын хэсэг байгуулагджээ. Түүнчлэн гэр хорооллын Их залуу, Уртын гол багт орон сууцны барилгууд барихаар төлөвлөсөн газарт шугамын трассыг гаргаж, шугам сүлжээний техникийн нөхцөл авч, ажлын зураг төсөл боловсруулах даалгавар боловсруулан батлуулж, ус дулаан дамжуулах төв болон гадна дулаан цэвэр усны шугам барих ажлын зураг төслийг боловсруулсан байна.

  Мөн Орхон аймгийн Авто тээврийн төв дээр автомашины улсын үзлэгтэй холбогдуулан иргэдийн дараалал ихээр үүсээд байсан тул аймгийн удирдлагуудын зүгээс Авто тээврийн үндэсний төвд хүсэлт тавьснаар нэг бүртгэгчийн орон тоог нэмж батлуулснаар 6 дугаар сарын 1-ний өдрөөс эхлэн хоёр бүртгэгчтэйгээр үйл ажиллагаа явуулахаар боллоо. 

  Хотын захирагчийн албанаас болзошгүй аваарын зардлаар 3 цэцэрлэгийн дээврийн засварыг хийлгүүлж байгаа бөгөөд одоогоор ажлын явц 60 хувьтай байна. 

  Шуурхай хуралдааны төгсгөлд аймгийн удирдлагуудын зүгээс хэдэн хэдэн үүрэг даалгаварыг өглөө. 

  Үүнд, МУ-ын Засгийн газрын 152-р тогтоол гарсантай холбогдуулан 2021 оны Ерөнхийлөгчийн сонгуулийн санал авах үеэр короновируст халдварын улмаас тусгаарлагдсан болон, хэвтэн эмчлүүлж буй иргэдээс санал авах ажлын бэлтгэлийг хангах, хөрөнгө оруулалт, бүтээн байгуулалтын ажлыг цаг агаарын нөхцөл байдалтай уялуулан чанартай зохион байгуулах, сургууль цэцэрлэгийн бүс орчимд хүүхдийн аюулгүй байдлыг хангах үүднээс замын тэмдэг тэмдэглэгээ, гэрэлтүүлэг, хяналтын камерийг байрлуулах цогц зураг төсөв боловсруулах, хотын ногоон бүсийн эзэнгүй дүүргийн хог хаягдал, сэг зэмийг цэвэрлэх зэрэг үүрэг даалгаварыг холбогдох байгууллагуудад өглөө.

Мэдээллийн төв