Жил бүр уламжлал болгон зохион байгуулагддаг байсан аймгийн “Тариаланчдын зөвлөгөөн” короновирусын халдварт цар тахлын улмаас энэ жил цахимаар зохион байгуулагдлаа.

  Зөвлөгөөнийг нээж аймгийн ХХААГ-ын дарга Ж.Бат-Өлзий үг хэлсэн бол аймгийн Засаг дарга С.Батжаргал цахимаар холбогдож зөвлөгөөнд оролцогчдод хандаж мэндчилгээ дэвшүүлсэн юм.

  Орон нутгийн удирдлагуудын зүгээс “Төрөөс Хүнс, хөдөө аж ахуйн талаар баримтлах бодлогыг хэрэгжүүлэх аймгийн дэд хөтөлбөр” боловсруулсан. Мөн “Өрхийн тариалалтыг дэмжих хөтөлбөр”, “Эрдэнэт үйлдвэрлэл” хөтөлбөрүүдийг аймгийн Засаг даргын зөвлөлийн хурлаар хэлэлцэн, аймгийн иргэдийн Төлөөлөгчдийн Хурлын Тэргүүлэгчдийн хуралдаанаар батлуулахаар ажиллаж байгаа талаар мэдээлэл өглөө.

   Түүнчлэн ХХААХҮЯ-ны Газар тариалангийн бодлогын хэрэгжилтийн зохицуулах газрын дарга В.Үнэнбат оролцож “Хаврын тариалалтын бэлтгэл ажлын явцын талаар”, Хөдөө аж ахуйг дэмжих сангийн Гүйцэтгэх захирал О.Сумъяасүрэн оролцож Газар тариалангийн салбарт 2021 онд олгох дэмжлэгийн тухай мэдээллээ.

2021 онд аймгийн хэмжээнд:

• Үр тариа 3.905 га-д тариалж 9.372 тн ургац га-аас 24 цн 

• Ногоон тэжээл 242 га-д тариалж 532 тн ургац га-аас 22 цн  

• Төмс 343 га-д тариалж 4.116 тн ургац га-аас 120 цн

• Хүнсний ногоо 370 га-д тариалж  4.440 тн ургац га-аас 120 цн хураан авах

• 6 аж ахуйн нэгж, 3 иргэн 3.550 га талбайд уринш хийх бөгөөд

нийт 17 аж ахуйн нэгж, байгууллага, 800 гаруй өрх газар тариалангийн  үйлдвэрлэл эрхлэхээр бэлтгэл хангаад байгаа аж.   

   Зөвлөгөөнд оролцсон иргэдийн зүгээс Хөдөө аж ахуйг дэмжих сангаас хэрхэн зээл, тусламж авах, зоорь, хүлэмжийн асуудалд дэмжлэг үзүүлэх, намар ургац хураалтын үед ажиллах хүчийг нэгдсэн журмаар зохион байгуулах боломж бололцоо байдаг талаар сонирхож байлаа.

  Мөн Жаргалант сумын Мухар булангийн усалгааны шуудууг сэргээн засварлахад техникийн туслалцаа шаардлагатай байгаа, өрхийн тариаланчдад чиглэсэн, хөнгөлөлт зээл тусламж, төмс хүнсний ногооны борлуулалтад анхаарч өгөх зэрэг санал хүсэлтийг тавьж байлаа.

Мэдээллийн төв