"Одоо ирээдүй хоёрт мөнх орших Монгол"

2015-06-20 00:00 Уншсан тоо: 508
Үнэлгээ өгөх
(0 санал)

Хөх төмрийн ирээр хөрст орчлонг хэмжсэн ч
Хөгөлгөр уулсынхаа бэлд жаахан үр нь байсан
Хүлэг морьдын туураар ертөнцийн хязгаарт хүрсэн ч
Хөдөө цайдмынхаа захад балчир хүү нь байсан
Өвгөдийг тавьсан бэлийнхээ хүрэн хөрсөнд хүрэхдээ
Өөвөн бяцхан үрийнхээ зулай адил энхрийлсэн
Өргөн тунгалаг мөрнийхөө рашаан уснаас хүртэхдээ
Өрлөг буурал ээжийнхээ сүү адил сүсэглэсэн
Их дээдсийн удам билээ бид
Элгэн дээрээ эвийлсэн үрс билээ бид
Гэтэл...
Ясаа тавьж гагнасан газрын хээлийг нь хөндөж
Язгуур мөнх оршсон нутаг усыг нь самарч
Ялтан адил цээрлүүлж, хүн чулууг нь хазайлгав
Яргачин адил аашилж, аугаа нэрийг нь цаазлав
Гэвч...
Түүхийн шаргал хуудаснаас дээдсийн хилэн эргэж байна
Түмний гэгээн оюунаас бодлын үнэн ирж байна
Хөрстийн цэнхэр элгэн дээр тэнгэрийн зарлиг тодорч байна
Хүмүүний саруул ухаанаас зүрхний совин задарч байна...
Гэхүйд...
Одохуй ирэхүйн зуур омог төгөлдөржих Монгол
Онож төрсөн заяандаа буцаж хоргодох Монгол
Олон зууны өнгөнд үл хувьсах Монгол
Одоо ирээдүй хоёрт мөнх орших Монгол
Мэдтүгэй...
Срона. 2014.07.05

Сэтгэгдэл үлдээх

АНХААРУУЛГА: Уншигчдын бичсэн сэтгэгдэлд tungalag.mn хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.